கனமழை முன்னெச்சரிக்கை: நெற்பயிர்களை பாதுகாக்க அரசு உத்தரவு

தமிழகத்தில் கனமழை பெய்யும் சூழலில், வயல்களில் உள்ள நெற்பயிர்கள், அறுவடை செய்யப்பட்ட நெல் மூட்டைகள் சேதமடையாமல் பாதுகாக்கத் தேவையான நடவடிக்கைகளை உடனடியாக மேற்கொள்ளுமாறு வேளாண்மைத் துறை அதிகாரிகளுக்கு தமிழக அரசு உத்தரவிட்டுள்ளது.

மழையால் பாதிக்கப்படக்கூடிய பகுதிகளைக் கண்டறிந்து, விவசாயிகளுக்கு ஏற்படும் இழப்புகளைக் குறைக்கவும், மாவட்டந்தோறும் அவசர உதவி மையங்களை அமைக்கவும் அறிவுறுத்தப்பட்டுள்ளது.

இது தொடர்பாக வேளாண்மை மற்றும் உழவர் நலத் துறை அமைச்சர் வினோத் வெளியிட்டுள்ள அறிவிப்பில் கூறியிருப்பதாவது: மழைநீர் தேங்க வாய்ப்புள்ள வயல்களை அதிகாரிகள் நேரில் சென்று ஆய்வு செய்ய வேண்டும். அறுவடைக்குத் தயாராக உள்ள நெற்பயிர்களையும், ஏற்கெனவே அறுவடை செய்த நெல்லையும் மழையிலிருந்து பாதுகாக்க வேண்டும்.

அரசு நெல் கொள்முதல் நிலையங்களில் அடுக்கி வைக்கப்பட்டுள்ள நெல் மூட்டைகள் மழையில் நனையாமல் இருக்க, அவற்றின் மீது தார்ப்பாய்கள் அல்லது பாதுகாப்பு உறைகளைப் போட வேண்டும். தேவைப்பட்டால், நெல் மூட்டைகளைப் பாதுகாப்பான இடங்களுக்கு மாற்றவும் ஏற்பாடு செய்ய வேண்டும்.

வயல்களில் மழைநீர் தேங்குவதைத் தடுக்க, பாசனக் கால்வாய்கள் மற்றும் வடிகால் வாய்க்கால்களில் உள்ள அடைப்புகளை அகற்ற வேண்டும். மழைக்குப் பிறகு வயல்களில் தண்ணீர் தேங்கினால், அதை வெளியேற்றுவதற்காக டிராக்டர்கள், நீரை வெளியேற்றும் பம்புகள் உள்ளிட்ட இயந்திரங்களைத் தயாராக வைத்திருக்க வேண்டும்.

வேளாண்மை, தோட்டக்கலை மற்றும் வேளாண் பொறியியல் துறை அதிகாரிகள் உள்ளாட்சி அமைப்புகளுடன் இணைந்து இந்தப் பணிகளை மேற்கொள்ள வேண்டும். மழையால் பயிர்கள் சேதமடைந்தால், அதிகாரிகள் உடனடியாக வயல்களுக்குச் சென்று பாதிப்புகளை ஆய்வு செய்ய வேண்டும். சேதமடைந்த பகுதிகளைப் புகைப்படம் எடுத்து, அவை அமைந்துள்ள இடத்தின் விவரங்களுடன் அறிக்கை சமர்ப்பிக்க வேண்டும்.

பயிர் சேதத்தை விரைவாகக் கணக்கிட்டு, அரசின் நிவாரண உதவி பெறத் தகுதியுள்ள விவசாயிகளுக்கு உரிய நிவாரணம் கிடைக்கவும் நடவடிக்கை எடுக்க வேண்டும்.

மாவட்ட அளவில் அமைக்கப்படும் அவசர உதவி மையங்கள் மூலம் விவசாயிகளின் புகார்கள் பெறப்பட்டு, தேவையான உதவிகள் ஒருங்கிணைக்கப்படும். மழை தீவிரமடைவதற்கு முன்பே பாதுகாப்புப் பணிகளை முடிக்க வேண்டும். களப்பணியில் ஈடுபடும் அதிகாரிகளின் பாதுகாப்பையும் உறுதி செய்ய வேண்டும். இவ்வாறு அமைச்சர் தெரிவித்துள்ளார்.